|
|
|
 |
|
|
 |
|
|
|
|
|
|
| |
Roj û şev
|
min bi xwîna dil mivîsî, reşbelek bo yarî ma
bi dilovanî sivik bik, tu li mil min barî ma
çunkî zaro me, dibin barê evînê zorî ma
beske xeşmê tu li min, da ey şah û xunkarî ma
ez bi nalîn û fîxan im, bê seman im şev û roj
min bi zarotî evînî, bi xwe kir armanc û kar
min nizanî keyse dildarî, ne ku soz û qerar
ez evîndar im tenê, îro gulek nakî bihar
zulfê sor dûpişkê tev jehr in û ebrû tîremar
pir wekî min dil digestin, ez bi jan im şev û roj
sed mela û şêx bi berbejn û nivişt û qelema
Feqiyê Teyran bi qêrîn ku ji ber av û çema
Rustemê zalê bi şûr û gurz û mertal û rema
Bên bihan im naşikînim leşkerê derd û xema
Ketme tora dilberan ez bi fîxan im, şev û roj
Ma gelo dîsa bibînim her wekî dewra berê
Bejn û bala wê şepalê, zulf û bisk û temberî
Geş bibî pêta evînê şewq û pertew jê herî
Da bi merdî dil bi soz im, ez li ser wî agirî
Ez ne poşman im tu carî, vînperest im şev û roj
Qehremanên dewleta Medî, Kîtanî û Horiyan
Herqelê Romê di gel dehqanê Hind û Ariyan
Padîşahê textê Faris, Kesrewê îraniyan
Tev dibin darê te bin taca serê şah û keyan
Rû bide Tîrêj hevalê bê hedan im, şev û roj
* *
Buhar dem û dewrana minê
Serpişk û hem para minê
Bax û gulîzara minê
Mêrg û gulîstana minê
Xemala te nîşana zemîn
Kulîlk bi sed reng û bi bîn
Şair li ser te har û dîn
Adar û nîsana minê
* *
Ez pîr û kal bûm dewra min nema
Ketim ber pêlê derdan û xema
Werzê mi lê bû tişrîn û kanûn
Kulîlkêm weşyan ji şaxê lema
Jîna ciwanî pişta xwe da min
Lerz û êş û ta ketin laşê min
Kabûsê Mirnê Berê xwe da min
Bi kerb û bi kîn nizanim çima ..
|
| |
|
|
| |
BÎST Û YEKÊ ADARÊ |
Bîst û yekê adarê, hezar carî bi xêr hat
Di dewrana biharê, Newroz û cejna welat
Agir li deşt û çiyan, pêtî jê diçne banî
Li çar koşê Kurdistan, dikî şewq û xuyanî
Ew agirê dilê me, pêtî jê diçne ezman
Perava xwe da welat, deşt û çiya û zozan
Keç û xortên di kurdan, li her war û der û cî
Bi ser bejna xwe berdan, xeml û xêza kurmancî
Keç û xort û mêr û jin dikin pîroziya hev
Tev rûgeş in, devliken bi ax û xweziya hev
Bi kêf û şadîmanî girtine reqs û govend
Yekîtî mehrevanî ne b'eşîrtî ne b'dubend
Ji bo me pir ziyan in, ev dubendî eşîrî
Bi van rêçên xwar û mar, doza me naçe serî
Heta ku em nebin yek, nabe tu kar û xebat
Goga xwe em nabin şeg, azad nabe welat
Divê bi dilpaqijî, destê xwe em bidin hev
Çi çotkar û çi karker, bi yek can û dil û dev
Hinga em xweş dikarin, bikin daw û doza xwe
Bi serbestî azadî, pêk bînin newroza xwe
Hêvî dikim ji Yezdan, her sal weke vê rojê
Bikin pîroziya hev, bê par nebînin em jê
Hem jî bê par nemînin, ji raman û doza xwe
Bi dilxweşî bistînin, em jî îro mafê xwe
Mafê me jî bighê me, wek milletê cîhanê
Azad bijîn der welat, di vê dewr û zemanê
Wekî îro li hev kin, pîroziya welatê
Ji dil xwe em bi derkin, vê keder û şewatê
Wek îro em silav kin, li şehîdêd goristana
Baqên gulan belav kin, li tirbên cengevana
Destan li hev dibestin, li ber gorêd ciwana
Demek em tev biwestin, ji bo wan pehlewana
Ji bîr nakin tucarî, xebata wan şepala
Ne b'şev û roj û meha, ne jî bi heyam û sala
Ew şehîdên dilawer, canê xwe kirne qurban
Xemilandin bi xwîna xwe, axa kurd û Kurdistan
Daxwaza min ji dinyê, ji vê pê ve min navê
Tîrej li ser we û wan, dike herdem silavê
|
| |
|
|
NÛ ROJ |
Adar e adar e, newroza me ye
Xweş cejn û sersale, newroza me ye
Adar çi şêrîn e, cejna ariyan
Welat hemî şîn e, newroza me ye
Adar bi ser me'd tê, hersal wek îro
Bihna gula xweş tê, newroza me ye
Agir emê dadin, li deşt û zozana
Ji mafê xwe em nadin, newroza me ye
Alê emê rakin, ser xan û sera
Dilê millet şa kin, newroza me ye
Sazbend di gel sazan, hûn pêk ve bidin
Ber deng û awazan, newroza me ye
Xort û keç û qîza, bejna xwe bidin
Ber xeml û ber xêza, newroza me ye
Dakevne govenda, bezma şahiyê
Li bajar û gunda, newroza me ye
Derdê dilê millet, hûn derman bikin
Xweş deme ev firset, newroza me ye
Karker û cotkar tev, îro wek bira
Destê xwe bidne hev, ev doza me ye
Das û bivir rakin, ser dest û mila
Welat pê avakin, ev doza me ye
Bê xwendin û zanîn, em pêş nakevin
Bê ceng û hem bê xwîn, newroza me ye
Ta kengî tê wa bî, ey xortê dilêr
Bê yekîtî nabî, ev doza me ye
Ta ku nebin yek tev, nabî tu xebat
Karê me naghê hev, ev doza me ye
Bi sûnd û peyman be, bi gurzê Rustemî
Bi çakûça Kawa be, ev doza me ye
Herdem ezê bêjim, best û dîrokan
Seydayê Tîrêj im, ev doza me ye. |
| |
|
NÛROZ
|
Serî rake ji temara xewê, da ey dilê jar
Serê rojê bi der ket, çûn ji ser me ew şevên tar
Perava xwe veda, çar koşê Kurdistan sera ser
Kirî rohnî hemî deşt û newal û koh û zinar
Mij û ewrên di reş çûn, va li ser me bûye sahî
Zivistan çû bi serma xwe, li me xweş bûye bihar
Bihar her sal bi ser med tê, di gel wê cejna Newroz
Çi cejnek pir xweş e ey dil, delal û nav û nazdar
Di vê rojê de Kawa ku bi çakûçê edalet
Kirî perçe serê Dehakê xwînrêj û sitemkar
Di vê rojê nejadê Kurd, ji bin xeşmê bi derket
Bibû kêf û xweş û şahî, li her cih û der û war
Ji xwe'r carek binêre dil, li her cî şademan e
Li her cî reqs û govend e, çi gund û şehr û bajar
Bi xeml û xêza kurdî ne, wekî hawayê kevnar
Di gel hev ew bi kom û cot û tek, têne semayê
Çi mêr û jin çi xort û qîz, çi zarok û çi yixtiyar
Li xwe wergirtî ye qadê, kiraskî şîn î heft reng
Kulîlk û çîçek û nêrgiz, vebûn wa bişkivîn dar
Tilûr û bilbil û şalûr, quling û qaz û legleg
Ewan mêrg û çîmen kirne, ji bo xwe hêlîn û war
Hela carek tu jî rabe, here çayê Kurdistan
Kurdistan pir xweş e ey dil, wekî baxê Gulîzar
Hemî dehl û rez û mêrg in, hemî bax û di bistan
Hemî av û çem û kanî ne, hem jî cok û cobar
Temaşeke li hewdê sorgula, carek bi şahî
Tu guhdêre li dengêd bilbilan tim qîr û hewar
Eger xestey Kurdistan, bo te nuzhetgah e ey dil
Eger hey dil evîndar î, ew e baxê evîndar
Bi wî dengê xwe yî taze, bike hewar û gazî
Wekî bilbil bike fîxan, di nêv baxan li ser dar
Bibin sukran û serxweş, ew bi deng û best û eşar
Tu çend sal û zemanê xwe, bi şahî lê bibûrin
Ji bîr bik tu xem û derd û xiyalên xwe'y di kevnar
Bi erzanî meke winda, evê jîna ciwanî
Me jîn hêja li nîv ro ye, nebûye lê tu êvar
Berî mirna xerabmal, can bikî nîşan û armanc
Berî tîra xwe ey dil, ew di laşê me'd bikî xwar
Bihêlin em ji bo millet, hinek dîrok û xweşxuwan
Xebata bo welat ferz e, li ser me roj û êvar
Dema Tîrêj here gorê, bi şahî şademanî
Di heqê miletê kurd de, nebim ey dil gunehkar
Bi vê helbestê ya taze, ku vêga ez dixwînim
Dikim pîroz heval û hogir û sed dost û sed yar.
|
| |
|
|
QULINGO |
Qulingê min çima îro
Bi qîrên tê ji germiyana
Bi ceng û bask û perwazan
Berê te wa li zozanan
Li te rê dûro, westawo
Ji heval hogiran mawo
Berê te her li berjor e
Dikî gazî li pê wana
Bi vê qîrîn û hawarê
Xem û derdêm te tev rakir
Birînên dil te axaftin
Bi wan êş û kul û jana
Gelo ma qey tu dilya ye
Ji germa kerbela jaro
Di vê cihê bav û bapîran
Welatê berf û barana
Welatê kanî û ava
Welatê wa çem û mava
Welatê çîçek û baxa
Welatê mêrg û çîmana
Welatê fêris û mêra
Cihê comerd û camêra
Welatê kaniya zêra
Cihê petrol û mircana
Welatê bilbil û bazan
Welatê şalûr û qazan
Welatê dîlber û nazan
Welatê ebr û qeytanan
Wealatê kovî û şêran
Welatê xêr û hem bêran
Welatê gol û avgêran
Cihê Medya û Mîtana
Weyaxud tu evîndarî
Dixwazê dîtina yarê
Di gel hev ku bikin seyran
Di nîv bax û gulîstana
Li te mizgîn qulingê min
Qonaxa te ne pir dûr e
Bi yek firê tu dighê cem
Di nava erd û ezmana
Ne wek rengê min diljar î
Ji gist û dîtina yara
Me çeng û bask û per nîne
Ku wek te bighêjim wana
Ji Yezdan ez dikim hêvî
Tu bighê meqsed û wara
Bi dilşahî li hev rûnin
Li ser darên di qizwana
Bi xwedê kî qulingê min
Tu raweste hela carek
Ji te'r bêjim du sê peyvan
Delalê ber dil û cana
Berê te ger li Amed bî
Tu xweş deynî qulingê min
Li kêla Sêx Seîdê kurd
Bidî ber deng û fîxana
Bikî qêrîn li ser gorê
Ku kuştî pêk ve bin dorê
Silavê min li hemyan ke
Heval û hogirê wana
Silavê min bikî dîsa
Li kurdê ameda rengîn
Li wa girtiyên di riya millet
Di çal û hepsa û zindana
Eger tu diçî Mehabadê
Li nîv gorê şehîdan deyn
Bibêje Qadî û Seyfî
Hezar rehmet li ser wana
Berê te ger li Serhed bî
Weyaxut Dêrsim û Sason
Li zozanê şerefdînê
Li Agrîdax û Sîpana
Silavê min li kurdan ke
Çi xort û qîz mêr û jin
Li xakî kurd û Kurdistan
Li birc û xan û eywana
Bibêje ku gelek Tîrêj
Ji bo we tim pesindare
Belê ma çi bikî ew gêj e
Ji ber van çerx û dewrana
|
|
|
|
|
|
|
|
|
|
 |
 |
 |
|
ÇáãÞÇáÇÊ ÇáãäÔæÑÉ ÊÚÈÑ
Úä ÑÃí ÃÕÍÇÈåÇ æáÇ ÊÚÈÑ ÈÇáÖÑæÑÉ Úä ÑÃí
ÇáãæÞÚ
|
|
