Çavên te … !

Ronî ELÎ

Çavên te … !

Kelek û Gemiyên dilê nîvkuştî

Dane ber bahoz û pêlên bê binî

Di heşiniya sînga xwe de

Mest û gêj hilgirtin

Û ji kenarê bîranîn û afsaneyan

Bi dûr xistin …

***

Çavên te … !

Kevokên di dilan de basko kirî

Sinbilên di pençan de kedî kirî

Jinên bê ber

Û keçikên bê bext

Tev evîna di lepên lawiran de

Di helbesta min de lerizan din …

***

Çavên te … !

Di sînga Civilî de

Gurzên agirê Dojeha bêpariyê

Meya Buhişta siwarê Jinebiyan

Û fixana çivîkên zivistanê

Tev ahîna jinên mêr nemirî

Li hev xistin …

***

Çavên te … !

Bibilê Sînga birçî

Di nav dêm û gubega mijgulan de

Xiste cenga berberiya lêv û diranan

Gur û Şivanan

Mêyikiya dara benîştokê

Û girgîniya Gakûfiyê Newalan …

***

Çavên te … !

Stêrên merxê

Kaniyên çerxê

Sorgulên baxan

Xunçeyên şaxan

Di tûrikê Mila şevê de

Di kevçikê Dilê berfê de

li hev banan din …

***

Çavên te … !

Dçikên heyînê

Paçikên zayînê

Rêwiyên çem û kadizê

Şagirtên evîna Nêrgizê

tev boke, pîlot û dengizê

Li ser piştê meşandin …

***

Lê navê te … !

Dujeh û Buhişt

Perwîn û nivişt

Gur û Xezalê

Yar û delalê

Amojn û sêwî

Xwesî û hêwî

Li hev civandin

Û rakirin sema …

15. 9. 2003